રોહિત શર્માની વન-ડે ટીમમાંથી પણ બહાર થઇ શકે છે. 2027 વિશ્વકપ માટે BCCI કરી રહી છે ટીમ તૈયાર

ટીમ ઈન્ડિયાના દિગ્ગજ બેટ્સમેન અને કેપ્ટન રોહિત શર્માનું 2027નો વર્લ્ડ કપ રમવાનું સ્વપ્ન હવે મુશ્કેલીમાં મુકાય તેવું લાગે છે. આગામી ODI વર્લ્ડ કપ 2027માં દક્ષિણ આફ્રિકામાં યોજાશે, ત્યાં સુધીમાં રોહિત 40 વર્ષનો થઈ જશે. આવી સ્થિતિમાં, જો બધા મીડિયા રિપોર્ટ્સ પર વિશ્વાસ કરવામાં આવે તો, ભારતીય ક્રિકેટ કંટ્રોલ બોર્ડ (BCCI) ODI ટીમમાં નેતૃત્વ પરિવર્તનની યોજના બનાવી રહ્યું છે.

એક અહેવાલ મુજબ, BCCI ને અપેક્ષા હતી કે રોહિત ટેસ્ટમાંથી નિવૃત્તિની સાથે ODIમાંથી પણ નિવૃત્તિ લેશે. પરંતુ 38 વર્ષીય રોહિતે ODI ક્રિકેટ રમવાનો નિર્ણય લઈને બધાને આશ્ચર્યચકિત કરી દીધા જેથી 2027ના વર્લ્ડ કપનું સ્વપ્ન પૂર્ણ થઈ શકે. નોંધનીય છે કે રોહિતે 2023ના વર્લ્ડ કપમાં ભારતનું નેતૃત્વ કર્યું હતું, જોકે તે ટાઇટલ જીતવાનું ચૂકી ગયો હતો. આ પછી, તેણે ભારત માટે T20 વર્લ્ડ કપ અને 2025 ચેમ્પિયન્સ ટ્રોફી જીતી. ચેમ્પિયન્સ ટ્રોફીની ફાઇનલ જીત્યા બાદ રોહિતે કહ્યું હતું કે, “એક બીજી વાત – હું ODI ક્રિકેટમાંથી નિવૃત્તિ લેવાનો નથી. જેથી કોઈ અફવાઓ ન ફેલાય.”

જો અહેવાલો પર વિશ્વાસ કરવામાં આવે તો, BCCI હવે ODI ટીમમાં ફેરફાર કરવાનું વિચારી રહ્યું છે. ટીમ મેનેજમેન્ટ ભવિષ્યને ધ્યાનમાં રાખીને આ ફોર્મેટની કમાન પણ એક યુવા ખેલાડીને સોંપવા માંગે છે. BCCI પાસે 2027 વર્લ્ડ કપ પહેલા 27 ODI મેચ છે, જે નવા કેપ્ટનને તૈયાર કરવાની સારી તક આપશે. સૂત્રોના જણાવ્યા અનુસાર, રોહિત શર્માની જગ્યાએ શ્રેયસ ઐયરને કેપ્ટનશીપ મળી શકે છે. ઐયરે IPLમાં ત્રણ ટીમોનું નેતૃત્વ કર્યું છે અને મુંબઈ માટે સૈયદ મુશ્તાક અલી ટ્રોફી પણ જીતી છે.

હાલમાં શ્રેયસ ફક્ત ODI રમે છે, પરંતુ આ IPL પછી તેને T20 અને ટેસ્ટ ક્રિકેટથી દૂર રાખવો મુશ્કેલ બનશે. હવે તે સત્તાવાર રીતે સફેદ બોલની કેપ્ટનશીપની રેસમાં જોડાઈ ગયો છે. તમને જણાવી દઈએ કે T20 વર્લ્ડ કપ જીત્યા પછી, રોહિતે T20 માંથી નિવૃત્તિ લીધી હતી. તે જ સમયે, તાજેતરમાં રોહિતે ટેસ્ટ ક્રિકેટને પણ અલવિદા કહ્યું હતું. જોકે, તેણે સ્પષ્ટ કરી દીધું હતું કે તે 2027નો વર્લ્ડ કપ રમવા માંગે છે.